Gunong geureudong sideh di pasee..
Teuma di Batee arah krueng raya
Sapa di ulon keu rakan di keudee..
Yang na di juree bandum sigala
Long peu ek rinyeun bek jitamong asee..
Meunan cit cagee oeh malam jula
Kadang han neutueng long keu meulintee..
^^maklum, tanyoe gasien tan na kuasa
Meukeusud di ulon neu cuba angkee..
Teuntang pang ulee dilee kheun raja
Yang na agama hana teumipee..
Leupie ngen ulee jroeh budi bahsa
Long keuneuk kisah saboh daerah..
Keurajeun meugah ji thei le donya
Di kutaraja troh bandar khalifah..
Luah that daerah sampoe u banda naira
Aceh Darusalam nanggroe syariah..
Dilee that meugah keu ulee donya
Le turki usmani nyo geuyu papah..
Geuyue peusiblah nanggroe pusaka
Meu abad-abad nanggroe geukeubah..
Goh na minyeuk gah atawa cahya
Turunan malem dum na that ceudah..
Ken biek penjajah bijeh beulanda
Awai phon sultan ali munghayat syah..
Sultan yang gagah siyasah geuba
Dum geupeusaho ubena daerah..
Peusaboh langkah u kutaraja
Cap sikureung ngen alam peudeung..
Manyang geu sunyung meujeureulah warna
Nanggroe meudelat jroeh geupeurintah..
Cukop that gagah ka deungon jaya
Alaidin Al-Qahhar ka geupeuluwah..
Dumna wilayah troeh u malaya
Dumna armada laju geu keurah..
Peutundok wilayah u kutaraja
Iskandar muda pih cukop that teugah...
Hukom geupapah cukop that mulia
Aneuk yang salah hana geu keubah..
Geu hukom bagah ngat bek meudosa
Wahe e aceh bansa meutuah..
Pemimpin ta papah ngen na agama
Bek salah langkah naggroe syariah..
Pajoeh boh mirah tinggai ta WA
Qanun meukuta alam dum ka geu keubah..
Keumeudoe bek teuplah beupah bak punca
Sayang dum reule naggroe syariah..
Keubeu peurtee mirah ka ta peularha
Oehnoe meumada rawi long kisah..
Bak poh dua blah di teuka jula
Aceh ken lumpoe meumada kisah..
Ta puwoe marwah lagee dile ka
مملكة اتشيه
Date : 15/4/2018
Place : Kutaraja
Written : Muhammad Iqbal Aceh Malaka