Ca'e cot uroe "Hikayat Malem" (Art)

Gambar : Ilustrasi

Ca'e cot uroe "Hikayat Malem" (Art)

Salamu'alaikom warahmatullah..
Ummi ngen ayah rakan sidumna..
Teungoh cot uroe ulon meukisah..
Khabaran leupah long keuneuk rawi..

Alhamdulilah pujoe keu Tuhan..
Seulaweut paban keu janjongan Nabi..
Saleum long peutroh keu mandum rakan..
Pat keuberadaan di sana sini..

Haba tan pucok ukheu tan uram...
"MALEM" hai rakan long cuba rawi..
Adak hana can lagak meutimphan ..
Kadang na pansan pusing sekali..

Ladom di ureung malem bak kitab..
Jak beut hai rakan beujeut keu abi..
Peutupat hukom ajaran tuhan..
Yang salah ta tham yang jroeh hai rakan tatem paduli...

Na cit yang malem bak pajoh apam bak pajoh timphan deungon seurabi..
Malem dum ureung na yang teot leumang..
Na yang bak parang na chit peuget jingki..

Kupi cot uroe mangat hana ban ..
Ngen sate matang mangat han sakri..
Ladom ka saheh malem nibak pacaran..
Seakan-akan suami istri...

Kadang na malem nibak tampai bhan..
Geumeuen saman deungon seudati..
Malem di ureung bak nak ek dewan..
Meuheut hai rakan keu dum bupati..

Malem sikula na jeut keu doktor...
Jeut keu profesor bak akademisi...
Malem bak publo nanggroe hayeu hanaban..
Rakyat ta kuran keu diri sendiri..

Keupu teuh malem dalam buet syeitan..
Nuraka seumban sideh di ukhrawi..
Hana Meukeusud meu ulok hai rakan..
Karana long tuan salah bak meurawi..

Muhammad Iqbal Aceh Malaka
Kutaraja, 18/04/2018