تزاد يميل دوركايم ف15 أبريل 1858 فمدينة إپينال ففرنسا، كبر فعائلة يهودية وسط الحخاميين، شي لي خلا باه يبغيه يتبع طريقهم ويقرا حتى هو على الدين ويولي حخام، سيد كان مرضي الولدين، وقرا نعام آس الدين ديالو، كان حربي وكايقرا مزيان وهادشي لي غايخليه يتقبل ف(مدرسة الأساتذة العليا) عام 1879،وغادي يتلاقى مع دراري مجهدين بحال جان جوريس و هنري برغسون، ولكن وخا هكاك ماعجبوش ديكور فالمدرسة، وغايبغي يطلع النيڤو ديال الفلسفة، حيت بانت ليه الفلسفة لي ضايرة بيه سطحية، هكدا باش غايكتاشف أوكست كانط, و الفلسفة الوضعية ديال هاد الساط، وغايتأثر بالكتابات ديالو، شي لي غايخليه يتأنسپيرا منو مشروع تكريس علم الإجتماع كعلم مستقل بداتو ولي كايهذف لكشف القواعد لي كاتخضع ليها التطورات ديال المجتمع،و هاد العجب كامل لي خشا فيه دوركايم راسو هو لي غايخليه إولي مؤسس ديال السوسيولوجيا بجانب أوكست كانط، ماكس ڤيبر، كارل ماركس، هربرت سبانسر، سان سايمون أو وحدين خرين… فكانت الرغبة ديالو هي يلقى حلول للمشاكل الإجتماعية بمناهج علمية البعيدة عن التأملات الفلسفية لي ماتنفع ماضر، كان هو كايشيء الظاهرة الإجتماعية وكايتعامل معها بالمقاربة الموضوعية
توفى بونضيضرات نهار 15 نوڤمبر 1917، وخلا من وراه توجه أو بالأحرى مدرسة ولي كاتسمى بالمقاربة الوظيفية، والإنجازات ديالو عطاو بزاف للسوسيولوجيا، بحيت كايتعتابر مرجع مهم، من بين المؤلفات ديالو؛ حول تقسيم العمل الإجتماعي، قواعد المنهج في علم الإجتماع، الإنتحار، الأشكال الأولية للحياة الدينية
من بين المفاهيم لي جاب؛ تقسيم العمل الإجتماعي، اللامعيارية، التضامن الألي و التضامن العضوي، التنشئة الإجتماعية، الوعي الجمعي أو الضمير الجمعي