經過琴日令我嘔向既一日之後,今日返工終於回復平靜同正常,如果今日都係咁既話,我諗我真係會爆血管死左囉,今日執返條命.
今日就唔太忙,都係安排一下寄板比客人批,覆下email就搞掂,今朝出門口個陣已經知掛緊一號風球,不過睇佢個死款.最多都係改掛三號,即係唔使諗今日可以返半日有得收工.
無驚無險又到一點,吔飯囉,今日我阿頭冇帶飯,我地又係兩條友出去食,出門口個陣見到冇落雨啦,咁咪唔帶遮囉.本來諗住去新澳食 (之前有發帖介紹過)不過到步之後,發現佢執左啊 !!!!!!!!!!! 世界末日啊 !!!!!!!!!!!!! 呢個疫情既影響浮晒面啦,連新澳咁旺都執得,我平時食開個間餐廳仔都危險囉.
唔得,我聽日一於去幫襯下老細,支持下佢,不過今日都係先解決眼前呢餐,既然新澳執左,咁我就行前幾步去試新野囉.我地太衝忙咁衝左入去拎位,連佢個名都未知添.
一睇個餐牌,咦,有料到喎,同新澳有得比,淨係午餐都十九幾二十個choice.地方又夠大,應該可以期待一下一陣個set lunch.今日我叫左個安格斯牛排配薯菜,唔知佢地啲薯條係咪用氣炸鍋炸出黎,食落好鬼乾身,不過又好鬼死脆喎衰鬼.牛扒既話呢…其實我估佢都係用西冷架啦.
不出所料,一啖咬落去,就知佢係西冷排扮肉眼扒,不過一分錢一分貨,52蚊貨仔都唔可以要求咁多架啦,上次我係超市買塊急凍肉眼都講緊48蚊,如果要係餐廳食肉眼扒,應該88蚊走唔甩.不過佢52蚊有野飲冇湯都好低架啦,可以有下次
回程時認真啲睇返新澳個面,見到佢地裝修緊,估計係頂左手比人囉,咁我就唯有期待新主人會搞得更出色啦.行到一半,仆街,落雨囉.冇帶遮真係憨居左.只好急急腳行返去,不過其實都冇用,我地已經濕鬼晒.希望唔好感冒就好,今日寫住咁多先,聽日繼續.