A Billboard That Sparked Curiosity and Concern | ایک بل بورڈ جس نے تجسس اور فکر کو جنم دیا

اشتہار

کچھ دنوں پہلے کی بات ہے. میرا معمول کے مطابق یونہی اپنے علاقے کی شاہراہ سے گزر ہوا تو یکایک میں ایک بڑا سائن بورڈ دیکھ کر چونک گیا. پہلے پہل تو میں نے صرف نظر کرنا چاہا، مگر وہ سائن بورڈ میرے دل و دماغ میں کھٹکنے لگا. اس سے قبل کہ میں اس بارے میں بات کروں کہ سائن بورڈ میں آخر ایسا کیا تھا جس نے مجھے چونکنے پر مجبور کر دیا، ایک طبعی تاثر بیان کرتا چلوں. آپ نے اکثر نوٹ کیا ہوگا، بلکہ مارکیٹنگ کی فیلڈ سے تعلق رکھنے والے حضرات بخوبی جانتے ہیں کہ ہم نے صارفین کی توجہ کیسے اپنی جانب مبذول کروانی ہے. اس کے لیے وہ نت نئی حکمت عملیاں تلاش کرتے رہتے ہیں. بعض اوقات تو بل بورڈز تجسس اور دلچسپی سے بھرپور ہوتے ہیں، بعض اوقات سنسنی خیز تصویر سے. میں نے یوں تو آتے جاتے کئی اشتہارات دیکھے ہوں گے مگر کچھ اشتہارات ایسے ہوتے ہیں کہ وہ آپ کے دماغ پر نقش ہو جاتے ہیں. مثال کے طور پر دو تین سال پہلے ایک اشتہار دیکھا تھا جس میں صرف یہ لکھا تھا: Life is too short for... اور اس کے بعد کہیں آئس کریم کی تصویر تھی، کہیں coffee تھی، کہیں کولڈ ڈرنک تو کہیں جوس وغیرہ کے گلاس تھے. میں ایک ہفتے تک مسلسل اس تجسس میں مبتلا رہا کہ آخر ان اشتہارات کا مقصد کیا ہے. بالآخر اگلے ہفتے پرانے اشتہارات کی جگہ جب نئے اشتہارات آئے تو ان میں Life is too short for کے بعد for sensitive teeth کا اضافہ نظر آیا، تب جا کر معلوم ہوا کہ درحقیقت یہ ایک ٹوتھ پیسٹ کا اشتہار تھا. اسی طرح ابھی گزشتہ سال ہی اسی طرح کا ایک اور اشتہار دیکھنے کو ملا جسے سرسری طور پر دیکھنے میں یوں لگتا تھا کہ پہلی تاریخ کا باریک سا چاند ہو. میں نے یہ سوچا کہ شاید کسی سورج یا چاند گرہن سے متعلق آگاہی بل بورڈ ہوگا، مگر بورڈ میں ایسا کچھ بھی موجود نہیں تھا. سو روزانہ میں تجسس کی کیفیت سے اسے دیکھتے ہوئے گزر جایا کرتا تھا. کچھ ایک ہفتے بعد معلوم ہوا کہ وہ ایک بسکٹ کا اشتہار تھا جس کا چمکتا ہوا کنارہ پچھلے اشتہار میں دکھایا گیا تھا. الغرض ان دو باتوں سے مطلوب یہ تھا کہ بل بورڈز جب انسان کی توجہ کھینچ لیتے ہیں تو اسے یاد رہتے ہیں اور یہی بہترین اشتہاری حکمت عملی بھی ہے.

ہائیو گروپ:

خیر، بات یہاں سے چل نکلی تھی کہ میں نے جب ایک دن گزرتے ہوئے اشتہار دیکھا تو مجھے حیرت کا جھٹکا لگا. وہ اس لیے کیونکہ اشتہار میں Hive Group کا تذکرہ تھا. میں جس ہائیو پلیٹ فارم کو جانتا ہوں، اس کی بل بورڈ مارکیٹنگ کا تو میں تصور نہیں کر سکتا تھا. سو، میں نے یہ سوچا کہ میری اوور تھنکنگ کا نتیجہ ہوگا. دن رات Hive دیکھ دیکھ کر یہی سر پر سوار ہونا ہے. لیکن کچھ دن بعد میرا گزر شارع فیصل سے ہوا، جو کہ کراچی کی سب سے مصروف اور معروف ترین شاہراہ ہے تو اس پر بھی میں نے یہی بورڈ لگے دیکھے. تب اتنی بات تو یقینی ہو گئی کہ میری آنکھوں نے دھوکہ نہیں کھایا. اب جیسا کہ میں نے کہا کہ مارکیٹنگ کے لیے کمپنیاں بسا اوقات اپنے اشتہار میں پوری وضاحت شامل نہیں کرتے بلکہ تجسس پیدا کرکے صارف کو اس بات پر ابھارتے ہیں کہ وہ خود انہیں تلاش کرکے مکمل معلومات حاصل کرنا چاہے تو یہاں بھی کچھ ایسا ہی سلسلہ تھا. سو میں نے اس پر تحقیق کرنی شروع کی تو معلوم ہوا کہ یہ ہائیو گروپ آف رئیل اسٹیٹ ہے. جب مزید تحقیق کی تو پتہ چلا کہ Hive کے نام سے تو دنیا بھر میں درجنوں کمپنیاں چل رہی ہیں. جبکہ یہ اتنا بڑا سوشل پلیٹ فارم ہے. فرض کریں کہ میں اپنے رئیل اسٹیٹ بزنس کا نام فیس بک رئیل اسٹیٹ رکھنا چاہوں، کیا میں رکھ سکتا ہوں؟ یقیناً نہیں. کیونکہ مجھے کوئی بھی حکومت اس نام کے استعمال کی اجازت نہیں دے گی. بالکل اسی طرح ہائیو بھی تو ایک سوشل پلیٹ فارم ہے. پھر اس کے ٹریڈ مارک پر کوئی ضابطہ و پابندی کیوں نہیں؟

میری رائے:

میں سمجھتا ہوں کہ Hive چونکہ ایک بہت بڑا پلیٹ فارم ہے اور بلامبالغہ اس کے باقاعدہ صارفین کی تعداد بھی ہزاروں میں ہے تو اسے ایک قانونی تشخص حاصل ہونا چاہیے. اس وقت انٹرنیٹ پر Hive کے نام سے درجنوں کمپنیاں کام کر رہی ہیں، جبکہ یہ بہت بڑا سوشل پلیٹ فارم ہے. ویسے یہ تو محض رائے ہے، مگر دل کی بات کہوں تو مجھے بل بورڈ پر اس کمپنی کا نام دیکھ کر برا اس لیے لگا، کیونکہ میں اسی نام کے پلیٹ فارم سے منسلک ہوں. ظاہری بات ہے جب ایک ہی نام کی دس کمپنیاں مارکیٹ میں کام کریں گی تو ایک کی بھی خراب پرفارمنس سب کو بھگتنی پڑتی ہے. پاکستان میں رئیل اسٹیٹ کا بزنس کرنے والوں کا ماضی کا ریکارڈ بھی بدقسمتی سے کچھ اچھا نہیں. میں نہیں جانتا کہ ہائیو گروپ نامی اس رئیل اسٹیٹ کے مالکان کیسے ہیں؟ کون ہیں؟ لیکن انہیں کم از کم یہ تو ضرور معلوم کرنا چاہیے تھا کہ اس نام سے اور بھی کوئی پلیٹ فارم موجود تو نہیں. ویسے بھی اب عوام اس قدر باشعور ہو چکی ہے کہ اصلی اور نقلی کا بآسانی فرق کر سکتے ہیں. خیر، ہم تو رائے ہی دے سکتے ہیں. کرنے والے تو کر چکے. امید کرتا ہوں کہ ان کے کسی بھی خمیازے کو ہمیں نہیں بھگتنا پڑے گا.