Mistrust | بدگمانی

ہمارے ارد گرد پھیلی بہت سی ایسی برائیاں ہیں جو جونک کی طرح ہم سے چمٹ کر اندر ہی اندر ہمیں کھوکھلا کرتی جا رہی ہیں. جو پیار، محبت، الفت، اخوت اور بھائی چارگی جیسے جذبات کے لیے زہر قاتل ثابت ہوتی ہیں. انہی میں سے ایک بہت بڑی معاشرتی برائی بدگمانی بھی ہے. بدگمانی سے مراد یہ ہے کہ آپ کسی شخص کے بارے میں ایسی بات سوچیں کو اس کا مقصد نہ ہو. مثلاً: ہمارے ہاں یہ ایک عام تاثر پایا جاتا ہے کہ اگر کسی کو اعلانیہ طور پر صدقہ خیرات یا کوئی اور نیکی کرتا ہوا دیکھتے ہیں تو ہمارے ذہن میں آنے والا پہلا خیال یہ ہوتا ہے کہ یہ شخص شہرت اور نام کمانے کی خاطر ایسا کر رہا ہے. گویا ہم اس کے بارے میں یہ گمان کرتے ہیں کہ یہ نیک عمل شہرت کی خاطر کر رہا ہے. لیکن دلوں کے حال تو رب ہی بہتر جانتا ہے. یہ بھی ہو سکتا ہے کہ وہ یہ عمل دکھاوے کے لیے نہ کر رہا ہو، بلکہ واقعی نیک نیتی سے کر رہا ہو اور ہم بلاوجہ اس سے بدگمان ہو رہے ہوں.

گناہ:

بدگمانی نہ صرف اخلاقی طور پر ایک غیر منصفانہ رویہ ہے، بلکہ ہمارا دین بھی ہمیں اس سے روکتا ہے. آپ دیکھیے قرآن مجید میں اللہ رب العزت کا ارشاد ہے:

یٰۤاَیُّهَا الَّذِیْنَ اٰمَنُوا اجْتَنِبُوْا كَثِیْرًا مِّنَ الظَّنِّ٘. اِنَّ بَعْضَ الظَّنِّ اِثْمٌ. (سورۃ الحجرات، آیت نمبر: 12)

اللہ رب العزت نے اس آیت میں اہل ایمان کو مخاطب فرماتے ہوئے یہ حکم صادر فرمایا ہے کہ بہت زیادہ گمان مت کیا کرو. کیونکہ بعض بدگمانیاں گناہ ہوتی ہیں. ہے نا کتنی خطرناک بات؟ کہ ہم جو دوسروں کے بارے میں غلط باتیں اپنے ذہن میں فرض کر لیتے ہیں، وہ ہمیں گناہ گار بنا دیتی ہیں. بسا اوقات یہ بدگمانیاں دوسرے یا تیسرے فرد سے ہم تک پہنچتی ہیں. ہم بجائے اس کی تحقیق کرنے کے، محض سنی سنائی باتوں پر ہی لڑنے مرنے کو تیار ہو جاتے ہیں. اور میری پچھلی بلاگز میں آپ یہ پڑھ ہی چکے ہیں کہ ہمارے پاکستانی معاشرے میں لڑائی نسل در نسل جاری رہتی ہے. زیادہ دور کیا جانا، ہمارے ہی رشتہ داروں میں ایسا حادثہ ہوا تھا کہ ایک بھائی نے اپنی زمین میں آک کا پودا لگایا. کسی شخص نے دوسرے بھائی کو جا کر بتا دیا کہ تمہارا بھائی تمہاری زمین میں ناجائز تصرفات کر رہا ہے. بس پھر کیا تھا. یہ بھائی غصے میں بھرا ہوا آیا اور پودے کو اکھاڑ پھینکا. یہ دیکھ کر پہلا بھائی بھی غصے میں آگیا. چنانچہ یہ لڑائی اتنی بڑھی کہ دونوں کے قتل کی نوبت آگئی. ایک بھائی نے دوسرے کو مار دیا. پھر دوسرے بھائی کے بیٹوں نے اپنے چچا کو مار کر اس کا بدلہ لیا اب دونوں جانب سے سگے رشتہ دار ایک دوسرے کے قتل کے الزام میں گرفتار ہیں.

ندامت:

ابھی چند روز قبل ہی کی بات ہے کہ میرے امی ابو گھر کے قریب ہی واقع Chase Up سٹور سے 2 ڈنر سیٹ لے کر آئے. عموماً نئے ڈنر سیٹ فوراً کھولے نہیں جاتے. لیکن میری امی نے دیکھا کہ ایک ڈبہ پیک نہیں ہے. انہیں شک گزرا کہ کہیں اس میں سے سٹور والوں نے کچھ چرا نہ لیا ہو. جب ڈنر سیٹ نکال کر تمام برتن گنے تو واقعی 8 برتن کم تھے. حیرانی کی بات یہ تھی کہ برتنوں کی جوڑی میں سے 1 1 برتن کم تھا. اگر تو صرف پلیٹیں کم ہوتیں یا چمچ کم ہوتے تو یہ سوچا جا سکتا تھا کہ شاید کسی نے چوری کر لیے ہوں یا راستے میں گر گئے ہوں مگر تمام برتنوں میں سے ایک ایک برتن کا غائب ہونا تشویشناک تھا. سو امی اور ابو دونوں سر پکڑ کر بیٹھ گئے کہ سٹور والوں نے فراڈ کر دیا. پھر جب خریداری کے بل کو دیکھا کہ نمبر ملا لیں تو وہاں نمبر بھی موجود نہیں تھا. گوگل سے تلاش کرنے پر بھی نمبر نہیں ملا تو یہ شک یقین میں بدل گیا کہ سٹور نے ہم سے دھوکہ کر دیا ہے. اور انہیں بہت برا بھلا کہا گیا. ایک مایوسی کی سی فضا پیدا ہو گئی تھی. مگر ایک موہوم سی امید تھی کہ شاید کوئی غلط فہمی ہو گئی ہو. سو میں والدہ کو لے کر دوبارہ سٹور پہنچا تو فوراً آڈٹ مینیجر ہمارے پاس آیا اور انتہائی معذرت خواہانہ لہجہ میں گویا ہوا کہ: سر! ہمارے سٹاف سے غلطی ہوئی کہ وہ آپ کے پیکٹ میں ڈسپلے والا سیٹ ڈالنا بھول گئے. میں جب چیکنگ کرنے آیا تو میں نے دیکھا کہ ڈسپلے میں ایک سیٹ لگا ہوا ہے لیکن اس کا مکمل سیٹ غائب ہے تو میں ان سے پوچھ ہی رہا تھا کہ کس کو نامکمل سیٹ بیچ دیا ہے؟ یہ سن کر ہم حیران رہ گئے. کیونکہ آتے وقت ہمارے خیالات یہ تھے کہ نہ جانے یہ بدتمیزی کریں گے؟ پتہ نہیں واپس بھی کریں گے یا نہیں؟ یا ہمیں یونہی خوار ہو کر واپس آنا پڑے گا. مانا کہ غلطی تھی ان کی. مگر ہم نے بھی تو ان کے بارے میں منفی سوچنے میں کوئی کسر نہیں چھوڑی تھی نا.

سبق:

اس تمہید و تجربے کے بعد میں اس نتیجہ میں پہنچا ہوں کہ جب ہم کسی کے بارے میں بدگمانی میں مبتلا ہوتے ہیں تو سب سے پہلے تو ہم خود کو تکلیف دیتے ہیں. ظاہر سی بات ہے جب ہماری توقعات کے برعکس کوئی کام ہوتا ہے تو وہ ہم پر بوجھ بنتا ہے. ہم ذہنی طور پر پریشان ہوتے ہیں. پھر اس کے بعد وہ اس شخص کے لیے اذیت بنتا ہے ہمارے رویہ کی وجہ سے. اگر ہم بجائے بدگمانی پالنے کے براہ راست تحقیق کر لیں تو ہمارے بہت سے ٹوٹ جانے والے رشتے ٹوٹنے سے بچ جائیں یا جو ٹوٹ چکے ہیں وہ دوبارہ سے جڑ جائیں. ہم بدگمانیوں کی زد میں آ کر بہت سے وفادار، اچھے اور قیمتی انسان کھو دیتے ہیں. جبکہ اس کے برعکس مثبت خیالات کے نتیجے میں ہم نہ صرف خود پرسکون اور اطمینان بخش زندگی گزارتے ہیں، بلکہ ہم سے متعلقہ لوگوں کو بھی ہمارے متعلق یقین اور اطمینان رہتا ہے. خدشات لاحق نہیں ہوتے. اور یہی درس ہمیں سیرت سے بھی ملتا ہے کہ اپنے بھائی کے بارے میں ہمیشہ نیک گمان رکھو. لہٰذا ہمیں کسی بھی واقعے سے متعلق کوئی بھی بات ہو، اپنے پیاروں اور عزیز و اقارب کے بارے میں نیک گمان رکھنا چاہیے.

مثبت رہیں. مثبت سوچیں.