ଭୁବନେଶ୍ୱର ( ଏଟିଆର ବ୍ୟୁରୋ): ଆସନ୍ତାକାଲି ଠାରୁ ଆରମ୍ଭ ହେବ ବିଧାନସଭାରେ ବଜେଟ ଅଧିବେଶନ । ଏହି ଅବସରରେ ଆଜି ବାଚସ୍ପତ୍ତି ଏକ ସର୍ବଦଳୀୟ ବୈଠକ ଡାକିଛନ୍ତି । ଆଜି ଅପରାହ୍ନରେ ଏହି ବୈଠକ ବସିବ । ଗୃହ କିଭଳି ସୁରୁଖୁରୁରେ ଚାଲିବ ସେନେଇ ସବୁ ଦଳ ଓ ବିଧାୟକଙ୍କ ସହଯୋଗ ଲୋଡିଛନ୍ତି ବାଚଷ୍ପତ୍ତି ସୂର୍ଯ୍ୟ ନାରାୟଣ ପାତ୍ର ।
ସୂଚନାଯୋଗ୍ୟ ଆସନ୍ତାକାଲି ବିଧାନସଭାର ବଜେଟ ଅଧିବେଶନ ଆରମ୍ଭ ହେଉଥିବାରୁ ପ୍ରଥମ ଦିନରେ ଗୃହକୁ ରାଜ୍ୟପାଳ ପ୍ରଫେସର ଗଣେଶୀ ଲାଲ ସମ୍ଭୋଧିତ କରିବେ । ସେପଟେ ବିଜୁ ଜନତା ଦଳ ଓ ବିଜେପି ଓ କଂଗ୍ରେସ ପୃଥକ ଭାବେ ସେମାନେ ସେମାନଙ୍କ ବିଧାୟକ ଦଳ ବୈଠକ ଡାକିବେ । ବଜେଟ ଅଧିବେଶନ ଆସନ୍ତା କାଲି ଠାରୁ ଆରମ୍ଭ ହୋଇ ଏପ୍ରିଲ ୯ ତାରିଖ ପର୍ଯ୍ୟନ୍ତ ଚାଲିବ ।
ଆସନ୍ତା ୧୮ ତାରିଖରେ ଗୃହରେ ଅର୍ଥମନ୍ତ୍ରୀ ବିଧାନସଭାରେ ବଜେଟ ଉପସ୍ଥାପନ କରିବେ । ତେବେ ସୂତ୍ରର ସୂଚନା ଅନୁସାରେ ଏଥର ବିଧାନସଭାରେ ବିରୋଧୀ ବିଜୁ ପକ୍କା ଘର ଯୋଜନା ,ଓବିସି ଗଣନାକୁ ନେଇ ସରକାରଙ୍କୁ ଘେରି ପାରନ୍ତି । ସେହିଭଳି କାଳିଆ ଯୋଜନାକୁ ନେଇ ମଧ୍ୟ ଏ ସରକାରଙ୍କୁ ଘେରିବେ ବିରୋଧୀ ।
ଅନ୍ୟପଟେ କଂଗ୍ରେସ ରେଳ ବଜେଟରେ ହୋଇଥିବା ପାତର ଅନ୍ତରକୁ କଂଗ୍ରେସ ଗୃହରେ ଉଠାଇ ଉଭୟ ଶାସକ ଓ ବିଜେପିକୁ ଟାର୍ଗେଟ କରିବ । ସେହିଭଳି ଏଇ ନିକଟରେ ୧୧ କେଭି ବିଦ୍ୟୁତ ତାରରେ ଲାଗି ବସ ଦୁର୍ଘଟଣାରେ ୧୦ ଜଣଙ୍କ ମୃତ୍ୟୁ ହୋଇଥିଲା । ଏହି ପ୍ରସଙ୍ଗ ମଧ୍ୟ ବିରୋଧୀ ଗୃହରେ ଉଠାଇବେ ବୋଲି ଜଣା ପଡିଛି ।